fbpx

ارجن کپور کے بعد ملائکہ اروڑا کا بھی کورونا ٹیسٹ مثبت

Arjun Kapoor - Malaika Arora

Arjun Kapoor – Malaika Arora

ممبئی (اصل میڈیا ڈیسک) بھارتی فلم انڈسٹری کے ابھرتے ہوئے اداکار ارجن کپور کے بعد ان کے ساتھ رہنے والی آئٹم سانگ رقاصہ ملائکہ اروڑا نے کورونا ٹیسٹ مثبت آنے پر معالجین کی نگرانی میں خود کو گھر میں قرنطینہ کر لیا۔

بھارتی میڈیا کے مطابق فلم انڈسٹری میں آئٹم سانگ پر رقص سے شہرت حاصل کرنے والی ملائکہ اروڑا اور ان کے ساتھی اداکار ارجن کپور کا کورونا ٹیسٹ مثبت آیا ہے۔ ملائکہ کی بہن امرتا اروڑا میں بھی کورونا کی تصدیق ہوئی ہے۔ ملائکہ اروڑا، ارباز خان سے طلاق کے بعد سے ارجن کپور کے ساتھ دکھائی دیتی ہیں اور یہ افواہ بھی زیر گردش ہے کہ دونوں شادی کرنے والے ہیں۔

سماجی رابطے کی ویب سائٹ انسٹاگرام پر ایک پوسٹ کے ذریعے ارجن کپور نے اپنے مداحوں کو کورونا ٹیسٹ مثبت آنے پر آگاہ کرتے ہوئے لکھا ’’ یہ میری ذمہ داری بنتی ہے کہ اس حوالے سے آپ سب کو آگاہ کروں۔ کورونا ٹیسٹ مثبت آنے پر معالجین کی ہدایت پر میں نے خود کو گھر میں قرنطینہ کرلیا ہے‘‘۔

ارجن کپور نے مداحوں کی حوصلہ افزائی اور دعاؤں کا پیشگی شکریہ ادا کرتے ہوئے مزید لکھا کہ مجھے فی الحال کوئی علامت ظاہر نہیں ہوئی ہے لیکن دوسروں کی حفاظت کو یقینی بنانے کے لیے یہ فیصلہ لیا ہے۔ اپنی صحت سے متعلق آگاہ کرتا رہوں گا۔ میرا یقین ہے پوری انسانیت اس موزی وائرس سے نجات حاصل کرلے گی۔

بھارت میں کورونا وائرس کے نئے کیسز روزانہ کی بنیاد پچاس ہزار سے زائد سامنے آرہے ہیں اور فلم انڈسٹری سے جڑے کئی نامور شخصیات اس وائرس کا شکار ہوچکی ہیں۔ بچن خاندان نے وائرس کو شکست دیدی تاہم معروف شاعر راحت اندوری زندگی کی بازی ہار گئے جب کہ گلوکار ایس بی بالا وینٹی لیٹر پر موت سے نبرد آزما ہیں۔