fbpx

کرائسٹ چرچ ٹیسٹ: پاکستان کے ابتدائی بلے باز ایک بار پھر ناکام

Pakistan VS New Zealand

Pakistan VS New Zealand

نیوزی لینڈ (اصل میڈیا ڈیسک) دوسرے اور آخری ٹیسٹ کی پہلی اننگز میں پاکستان کے ابتدائی بلے باز کیوی بولرز کے سامنے ایک بار پھر ناکام ثابت ہوئے۔

ہیگلے اوول میں کھیلے جا رہے ٹیسٹ کے پہلے روز نیوزی لینڈ نے ٹاس جیت کر پاکستان کو پہلے بیٹنگ کی دعوت دی۔

قومی ٹیم کے اوپنر اوپنر جم نہ سکے، شان مسعود اور عابد علی کی جوڑی پھر ناکام رہی، حارث سہیل اور فوادعالم بھی کھانے کے وقفے سے پہلے پویلین لوٹ گئے۔

شان مسعود تو صفر پر ہی پویلین لوٹ گئے، دوسری وکٹ پر عابد علی اور اظہر علی نے 62رنز کی شراکت قائم کی، عابد علی بھی 25 رنز بنا کر واپس گئے، حارث سہیل ایک اور پہلے ٹیسٹ کے سنچری میکر فواد عالم صرف دو رنز بنا سکے۔

دوسری جانب تجربہ کار اظہر علی نے ذمے دارانہ بیٹنگ جاری رکھی اور کیریئر کی 32 نصف سنچری بنانے میں کامیاب رہے، کھانے کے وقفے پر پاکستان کا اسکور چار وکٹ پر 88 رنز تھا۔

کھانے کے وقفے کے دوران بارش کے سبب کھیل تاخیر سے شروع ہوا لیکن کچھ دیر بعد روک دیا گیا جو 40 منٹ رُکا رہا، دوبارہ میچ شروع ہونے پر اظہر علی اور محمد رضوان نے اننگز آگے بڑھائی، پانچویں وکٹ پر دونوں کے درمیان 50 رنز کی شراکت بھی مکمل ہوئی جبکہ کپتان محمد رضوان نے بھی نصف سنچری اسکور کی، وہ 61 رنز بنا کر آؤٹ ہوئے۔

پاکستان نے 5 وکٹوں کے نقصان پر 218 رنز بنا لیے ہیں، اظہر علی 90 اور فہیم اشرف 26 رنز کے ساتھ وکٹ پر موجود ہیں۔

نیوزی لینڈ کی جانب سے کائل جیمیسن 4 کھلاڑیوں کو آؤٹ کرنے میں کامیاب ہوئے جبکہ ایک وکٹ ٹم ساؤتھی کے حصے میں آئی۔

خیال رہے کہ دو ٹیسٹ میچوں کی سیریز کے پہلے میچ میں نیوزی لینڈ نے پاکستان کو 101 رنز سے شکست دی تھی۔