fbpx

کورونا: امریکا میں ہلاکتیں ڈیڑھ لاکھ سے بڑھ گئیں

Corona - America

Corona – America

امریکا (اصل میڈیا ڈیسک) کورونا وائرس اب بھی دنیا کے کئی ممالک میں تیزی سے پھیل رہا ہے۔ امریکا بدستور دنیا میں سب سے زیادہ متاثرہ ملک ہے جہاں ہلاکتوں کی تعداد ڈیڑھ لاکھ سے تجاوز کر چکی ہے۔

امریکا میں اموات کی تعداد 150,713 ہو گئی ہے۔ خبر رساں ادارے روئٹرز کے مطابق امریکا میں گزشتہ 11 دنوں کے دوران کورونا وائرس کے سبب ہلاکتوں کی تعداد 10 ہزار سے زائد ریکارڈ کی گئی۔ بدھ 29 جولائی کو امریکا کی تین بڑی ریاستوں کیلی فورنیا، فلوریڈا اور ٹیکساس میں ہلاکتوں کی اب تک کی سب سے زیادہ تعداد سامنے آئی۔

امریکا اس وقت کورونا وائرس سے سب سے زیادہ متاثرہ ملک ہے جہاں اس وائرس کے متاثرین کی کل تعداد 45 لاکھ کے قریب ہے۔

بھارت میں گزشتہ 24 گھنٹوں کے دوران کورنا وائرس کے 52,123 نئے کیسز سامنے آئے۔ کورونا کی وبا شروع ہونے کے بعد سے کسی ایک دن کے دوران نئے کیسز کی یہ اب تک کی سب سے بڑی تعداد ہے۔ اس اضافے کے بعد بھارت میں اب کورونا متاثرین کی مجموعی تعداد 1,583,792 ہوگئی ہے۔

بھارتی وزارت صحت نے گزشتہ 24 گھنٹوں کے دوران ہلاکتوں کی تعداد 775 بتائی ہے جس کے بعد وہاں اس سبب ہونے والی اموات کی مجموعی تعداد 34,968 ہو گئی ہے۔ کورونا کیسز کے لحاظ سے بھارت اس وقت امریکا اور برازیل کے بعد دنیا کا تیسرا سب سے زیادہ متاثرہ ملک ہے۔

ادھر ممبئی شہر میں ایک سروے کے مطابق جھُگیوں میں رہنی والی وسیع آبادی میں آدھے سے زیادہ لوگ کورونا وائرس سے متاثرہو چکے ہے۔ ایک اندازے کے مطابق ممبئی کے ان غریب ترین علاقوں میں کوئی ایک کروڑ بیس لاکھ لوگ بستے ہیں۔ حکام کے مطابق ٹیسٹنگ کے نتائج سے ظاہر ہوتا ہے کہ شہر کی آبادی اجمتاعی قوت مدافعت یا ‘ہیرڈ امیونٹی‘ کی جانب بڑھ رہی ہے۔