سابق ارجنٹائنی صدر پر جاسوسی کروانے کی فرد جرم عائد

Mauricio Macri

Mauricio Macri

ارجنٹائن (اصل میڈیا ڈیسک) سابق ارجنٹائنی صدر ماکری کو غیر قانونی جاسوسی کروانے کے الزام کا سامنا ہے۔ ان پر عدالت نے الزام عائد کیا ہے کہ انہوں نے آبدوز کے حادثے میں مرنے والوں کے لواحقین کی جاسوسی کا حکم دیا تھا۔

بدھ پہلی دسمبر کو ارجنٹائن کے سابق صدر موریسیئو ماکری پر عدالت نے باضابطہ طور پر فرد جرم عائد کر دی۔ عدالت کے مطابق انہوں نے اپنے دورِ صدارت میں ایک آبدوز کی تباہی کے بعد ہلاک ہونے والوں فوجیوں کے لواحقین کی جاسوسی کرنے کا حکم دیا تھا۔ سابق صدر، جو اس وقت قریبی ہمسایہ ملک چلی کے دورے پر ہیں، انہوں نے ان الزامات کو سیاسی قرار دیتے ہوئے من گھڑت اور تسلیم کرنے سے انکار کر دیا ہے۔

ارجنٹائن کی ایک عدالت کے جج مارٹن باوا نے عدالتی کارروائی کے دوران ایک سو چوہتر صفحات پر مشتمل فرد جرم جاری کرنے کا حکم صادر کیا۔ اب ان الزامات کے حوالے سے گواہان کے بیانات اور ان پر فریقین کے وکلاء جرح کریں گے۔

اگر استغاثہ سابق صدر پر الزامات ثابت کرنے میں کامیاب ہو گیا تو انہیں ملک کے انٹیلیجنس قوانین کی خلاف ورزی کرنے پر تین سے دس برس تک کی سزائے قید سنائی جا سکے گی۔

تریسٹھ سالہ سابق صدر کے خلاف جاسوسی کا حکم دینے کی شکایت فیڈرل انٹیلیجنس ایجنسی (AFI) کی موجودہ ڈائریکٹر کرسیٹینا کمانو نے جمع کرائی تھی۔ کمانو نے ہی مرنے والے فوجیوں کے رشتہ داروں کی جاسوسی سے متعلق شواہد کو جمع کیا تھا۔

ارجنٹائن کی نیوی کی آبدوز اے آر اے سان خوان نومبر سن 2017 بحر اوقیانوس میں کسی ٹیکنیکل خرابی کے بعد زیر سمندر ایک دھماکے سے تباہ ہو گئی تھی۔ اس حادثے میں چوالیس سیلرز اور افسران ہلاک ہوئے تھے۔

ان چوالیس مرنے والے فوجیوں کے لواحقین میں سے بعض کے خاندان والوں نے تفتیشی ادارے کو بتایا کہ ان کیے معمولات کی ویڈیو بنائی جاتی تھی اور ان کے فون بھی ٹیپ کیے جاتے تھے۔ انہوں نے یہ بھی بتایا تھا کہ انہیں ڈرایا اور دھمکایا بھی گیا کہ وہ مرنے والے فوجیوں کی مناسبت سے کسی زرتلافی کا مطالبہ نہیں کریں گے۔

عدالتی جج مارٹن باوا کے مطابق جو معلومات جمع کی گئیں ہیں اور ان کے پسِ پردہ جو نیت تھی، وہ واضح کرتی ہے کہ ان افراد کی غیر قانونی جاسوسی کا عمل جاری رکھا گیا اور اس سارے عمل میں انگلیاں ایک شخص کی جانب اٹھتی ہیں وہ ماریسیئو ماکری ہے۔

ارجنٹائن کے سابق صدر ماکری سن 2015 س 2019 تک منصب صدارت پر براجمان تھے۔ دائیں بازو کے سیاستدان اس وقت ملکی پارلیمان کے ایک لیڈر بھی ہیں۔

عدالت کے جج مارٹن باوا نے ماکری کو نو لاکھ نوے ہزار ڈالر کے عوض ضمانت بھی دے دی ہے۔ انہیں ملک چھوڑنے سے قبل باقاعدہ اجازت بھی لینی ہو گی۔

ماکری نے سابقہ پیشی پر عدالت سے کہا تھا کہ یہ مقدمہ سیاسی نوعیت کا ہے اور حقیقت سے دور ہے لہذا اس کو اس بنیاد پر ختم کر دیا جائے کیونکہ یہ عدالت ملکی انٹیلیجنس امور کا جائزہ لینے کا اختیار نہیں رکھتی۔ جج باوا نے ان کی اس درخواست سے اتفاق نہیں کیا تھا۔