گلگت بلتستان الیکشن: حلقہ جی بی اے 3 گلگت 3 پر پولنگ کل ہو گی

Gilgit-Baltistan Elections

Gilgit-Baltistan Elections

گلگت بلتستان (اصل میڈیا ڈیسک) گلگت بلتستان اسمبلی کے حلقہ جی بی اے 3 گلگت 3 اور جی بی اے 21 غذر 3 کے پولنگ اسٹیشن گندائے میں پولنگ کل ہو گی۔

جی بی اے 3 گلگت 3 پر انتخابات پی ٹی آئی کے جعفر شاہ کے انتقال کے باعث ملتوی کر دیے گئے تھے جہاں اب پولنگ کل ہوگی۔

اس حلقے میں 22 ہزار 232 مرد اور 19 ہزار 42 خواتین ووٹر موجود ہیں۔

دوسری جانب جی بی اے 21 غذر 3 کے پولنگ اسٹیشن گندائے میں 505 مرد اور 403 خواتین کل اپنا حق رائے دہی استعمال کر سکیں گے۔

15 نومبر کو پولنگ بکس شرپسند عناصر اٹھا کر لے گئے تھے جس کے باعث یہاں پولنگ روک دی گئی تھی۔

اُدھر دیامر کے حلقہ 3 ڈوڈشال کےخواتین پولنگ اسٹیشن نمبر 31 پر دوبارہ پولنگ کا نوٹی فکیشن واپس لے لیاگیا ہے۔

انتخابی نتائج کے خلاف جاری احتجاج اور امن و امان کی وجہ سےدوبارہ پولنگ ملتوی کی گئی ہے۔

غیرحتمی غیر سرکاری نتائج کے مطابق اس حلقے پر جے یو آئی کے رحمت خالق 5 ہزار 498 ووٹ لے کر کامیاب قرار پائے ہیں اور پی ٹی آئی امیدوار حیدرخان کو 48 ووٹوں سے شکست ہوئی۔