اسلام آباد (اصل میڈیا ڈیسک) قومی احتساب بیورو (نیب) نے پاکستان تحریک انصاف کے سیکریٹری جنرل اور رکن قومی اسمبلی عامر محمود کیانی کے خلاف انکوائری کا فیصلہ کر لیا۔
ذرائع کے مطابق سابق وفاقی وزیر برائے صحت عامر محمود کیانی کے خلاف ادویات کی قیمتوں میں غیرقانونی اضافے کے الزامات ہیں۔
عامر محمود کیانی اگست 2018 سے اپریل 2019 تک وفاقی وزیر صحت کے عہدے پر براجمان تھے، انہیں وزیر اعظم عمران خان نے 18 اپریل 2019 کو عہدے سے ہٹا دیا تھا۔
ذرائع کا کہنا ہے کہ چیئرمین نیب جسٹس ریٹائرڈ جاوید اقبال نے عامر کیانی کے خلاف نیب راولپنڈی کو انکوائری کی ہدایات دی ہیں۔
نیب کو رواں سال عامر کیانی کے خلاف شکایات موصول ہوئی تھیں،عامر کیانی کے خلاف شکایات کی تصدیق کے بعد ان کے خلاف انکوائری کا حکم دیا گیا۔
عامر محمود کیا نی راولپنڈی کے حلقہ این اے 61 سے رکن قومی اسمبلی منتخب ہوئے ہیں اور اس وقت پاکستانی تحریک انصاف کے جنرل سیکریٹری بھی ہیں۔
واضح رہے کہ رواں سال اپریل کے مہینے میں ادویہ ساز کمپنیوں نے ادویات کی قیمتوں میں 100 فیصد ازخود اضافہ کردیا تھا جس کے بعد جان بچانے والی ادویات کی قیمتوں میں بھی 400 روپے تک کا اضافہ کا ہوگیا تھا۔
عوام کی جانب سے احتجاج اور تنقید کے بعد وزیراعظم عمران خان نے ادویات کی قیمتیں بڑھانے والوں کے خلاف فوری کارروائی کا حکم دیتے ہوئے 72 گھنٹے میں قیمتیں واپس پرانی سطح پر لانے کا حکم دیا تھا۔
دنیا کو دہلا دینے والے قتل کو ایک سال بیت گیا
شمالی کوریا اور امریکہ دوبارہ سے مذاکرات کا آغاز کر رہے ہیں
