الریاض (اصل میڈیا ڈیسک) سعودی عرب نے پہلی مرتبہ بین الاقوامی سیاحت کو متعارف کرانے کی پالیسی پر عمل شروع کر دیا ہے۔ اب سعودی عرب کے مذہبی مقامات کے علاوہ دوسرے تاریخی مقامات کے لیے ویزا درخواست آن لائن دی جا سکتی ہے۔
سعودی عرب بین الاقوامی سیاحت میں قدم رکھتے ہوئے اپنے تاریخی مقامات کے لیے سیاحتی ویزوں کا اجرا اٹھائیس ستمبر سے شروع کر رہا ہے۔ اس مناسبت دنیا بھر میں قائم سعودی سفارت خانوں کو احکامات جاری کر دیے گئے ہیں۔ سعودی حکومت کی یہ کوشش ہے کہ سن 2030 تک مقامی اور غیر ملکی سیاحوں کی تعداد ایک سو ملین تک پہنچ جائے۔
سعودی کمیشن برائے سیاحت اور قومی ورثہ کے مطابق قواعد و ضوابط پر مشتمل ایک جامع پالیسی جمعہ ستائیس ستمبر کی شام جاری کی جائے گی۔ سعودی کمیشن کے چیئرمین احمد الخطیب کے مطابق سعودی عرب کا دروازہ بین الاقوامی سیاحت کے لیے کھولنا ایک تاریخ قدم ہے اور اس کے دوررس نتائج سامنے آئیں گے۔
ہفتہ اٹھائیس ستمبر سے سعودی عرب کے لیے انچاس ممالک کے شہری آن لائن ویزے حاصل کرنے کے لیے درخواستیں جمع کرا سکیں گے۔ اس حوالے سے تمام تر تفصیلات جمعے کی شام سے دستیاب ہو جائیں گی۔ سعودی حکومت کی خواہش ہے کہ امریکا، جاپان اور یورپی ممالک کے سیاحوں کو سعودی عرب کی سیاحت کے لیے ترغیب دی جا سکے۔
سعودی حکام نے اس توقع کا اظہار کیا ہے کہ یورپی شہری سعودی عرب کے ساحلی علاقوں میں بھی لباس میں اعتدال پسندی کا مظاہرہ کریں گے۔ یہ ایک پابندی بھی ہے۔ خاص طور پر خواتین بیکنی پہننے سے اجتناب کریں گی۔ اس کی وجہ سعودی معاشرے کی قدامت پسندی خیال کی گئی ہے۔
یہ امر ہے کہ سعودی عرب کو سیاحت اور بین الاقوامی سیاحوں کے لیے ایک سخت ملک تصور کیا جاتا رہا ہے۔ اس مقصد کے لیے انتہائی قلیل مدت کے ویزے جاری کیے جاتے تھے اور ان میں بیشتر کاروباری نوعیت کے ہوتے تھے۔ زیادہ تر وزٹ ویزوں کا تعلق حج یا عمرے سے ہوتا تھا یا پھر ایک مکمل خاندان کو سعودی عرب میں پھرنے کی محدود اجازت ہوتی تھی۔
بین الاقوامی سیاحت کے ویزوں کے اجراء کے قواعد و ضوابط کو عام کرنے کے لیے ایک خصوصی تقریب اہتمام کیا گیا ہے۔ یہ تقریب دارالحکومت ریاض کے نواحی تاریخی علاقے الدرعیہ میں منعقد کی جائے گی۔ الدرعیہ کو یونیسکو کے تاریخی ورثے میں شامل کیا جا چکا ہے۔ اس علاقے کے تاریخی محلات اور قدیمی عمارتیں منفرد حیثیت کی حامل ہیں۔
یہ امر اہم ہے کہ سعودی عرب کی سیاحت کے لیے جانے والے غیر مسلموں کو مسلمانوں کے مقدس شہروں مکہ اور مدینہ جانے کی اجازت نہیں ہے۔ ان شہروں میں غیر مسلموں کے داخل ہونے کی مذہبی ممانعت ہے اور سعودی حکومت اس حوالے سے سخت پالیسی اختیار کیے ہوئے ہے اور خلاف ورزی کرنے والے کو گرفتار کیا جا سکتا ہے۔
ایران پر عاید کی گئی پابندیاں نہیں اٹھائیں گے: ڈونلڈ ٹرمپ
امریکی پابندیوں کے باوجود ایرانی تیل، گیس خریدیں گے: صدر ایردوآن
