کراچی (اصل میڈیا ڈیسک) ملک کی سیاسی شخصیات بھی عمر شریف کے انتقال پر افسردہ ہیں اور انہیں خراج عقیدت پیش کر رہے ہیں۔
پاکستان پیپلز پارٹی کے چیئرمین بلاول بھٹو زرداری نے عمر شریف کے انتقال پر اظہار افسوس کرتے ہوئے کہا ہے کہ رونے والوں کو ہنسانے والا طنز و مزاح کا آفتاب آج غروب ہو گیا، عمر شریف کا انتقال باعثِ صدمہ ہے، مرحوم نے پاکستان میں فنِ مزاح کو نئی جہت بخشی، دعاگو ہوں کہ اللہ تعالیٰ مرحوم کی مغفرت اور انہیں اپنے جوار رحمت میں جگہ عطا فرمائے۔
صدر مملکت ڈاکٹر عارف علوی نے عمر شریف کی وفات پر گہرے رنج وغم کا اظہار کیا ہے، انہوں نے کہا کہ عمر شریف منفرد حس مزاح کے مالک تھے، انہوں نے کامیڈی کی دنیا میں اپنا علیحدہ مقام بنایا، اللہ تعالیٰ مرحوم کو غریقِ رحمت کرے، اہل خانہ کو صبر جمیل عطا فرمائے۔
گورنرسندھ عمران اسماعیل نے لیجنڈ کامیڈین کے انتقال پر اظہار افسوس کرتے ہوئے کہا کہ عمر شریف نے ساری زندگی لوگوں کے چہروں پر خوشیاں بکھیریں، بیرونِ ملک بھی عمر شریف نے اپنی صلاحیتوں سے پاکستان کا نام روشن کیا، عمر شریف کے انتقال کی خبر سن کر دل انتہائی غمگین اور دکھی ہے، فخرِ پاکستان عمر شریف ہمیشہ ہمارے دلوں میں زندہ رہے گا۔
وفاقی وزیر داخلہ شیخ رشید نے لیجنڈ اداکار کے انتقال پر اظہار افسوس کرتے ہوئے کہا ہے کہ ساری دنیا کو خوش رکھنے والا آج دنیا کو اداس کر کے چلاگیا، عمر شریف کا نام اپنے فن سے ہمیشہ زندہ و جاوید رہے گا۔
متحدہ قومی موومنٹ کے کنوینر ڈاکٹر خالد مقبول صدیقی نے عمر شریف کے انتقال پر اپنے تعزیتی بیان میں کہا کہ لیجنڈ فنکار عمر شریف کے انتقال پر افسوس ہے، پاکستان آج ایک قیمتی اثاثے سے محروم ہو گیا، عمر شریف کے صاحبزادے جواد سے ٹیلی فون پر تعزیت کی ہے۔
وزیراعلیٰ سندھ مراد علی شاہ نے عمر شریف کے انتقال پر گہرے دکھ کا اظہار کرتے ہوئے کہا کہ عمر شریف عظیم اداکار تھے، فن مزاح میں ان کی خدمات پوری دنیا میں یاد رکھی جائیں گی۔
وفاقی وزیر اطلاعات و نشریات فواد چوہدری نے کہا کہ عمرشریف پاکستان کا اثاثہ تھے، انہوں نے ہمیشہ قہقے بکھیرے ، انہوں نے پاکستان کی خدمت کی ہے، ان کے انتقال پر ساری قوم افسردہ ہے، عمر شریف کا خلا پر نہیں ہو سکتا۔
کامیڈی کے بے تاج بادشاہ عمر شریف کے انتقال پر اسٹارز غمزدہ
ٹیکس نادہندگان کو ادائیگی کیلیے 90 روز کا وقت دیں گے، وزیر خزانہ
