fbpx

ایشوریا اور ان کی بیٹی ارادھیا کورونا سے صحت یاب

Aishwarya Rai

Aishwarya Rai

بھارت (اصل میڈیا ڈیسک) بالی وڈ اداکارہ ایشوریا رائے بچن اور ان کی 8 سالہ بیٹی ارادھیا بچن نے کورونا وائرس کو شکست دے دی۔

گزشتہ دنوں میگا اسٹار امیتابھ بچن کا کورونا ٹیسٹ مثبت آیا تھا جس کے بعد پوری فیملی کا ٹیسٹ کیا گیا جس میں سے ابھیشیک، ایشوریا اور ان کی بیٹی میں بھی مہلک وائرس کی تشخیص ہوئی تاہم ابھیشیک کی والدہ و اداکارہ جیا بچن کا ٹیسٹ منفی آیا تھا۔

وائرس کی تشخیص کے بعد ایشوریا اور ان کی بیٹی ارادھیا کو گھر میں ہی قرنطینہ کیا گیا تھا تاہم سانس میں دشواری پر دونوں ماں بیٹی کو بھی ممبئی کے مقامی اسپتال منتقل کیا گیا تھا۔

تاہم اب ایشوریا رائے بچن اور ان کی بیٹی ارادھیا بچن نے کورونا کو شکست دے دی ہے اور دونوں کے ٹیسٹ منفی آنے کے بعد گھر منتقل کردیا گیا ہے۔

بالی وڈ اداکار و ایشوریا رائے بچن کے شوہر ابھیشیک بچن نے اپنی ٹوئٹ میں تصدیق کرتے ہوئے بتایا کہ ٹیسٹ منفی آنے پر ایشوریا اور ارادھیا کو اسپتال سے ڈسچارج کردیا گیا ہے تاہم میں اور والد امیتابھ بچن تاحال اسپتال میں ہی زیر علاج ہیں۔

خیال رہے کہ امیتابھ بچن اور ابھیشیک 11 جولائی سے ممبئی کے نانا وتی اسپتال میں زیر علاج ہیں جہاں ان کی طبیعت کافی بہتر ہے۔

وہیں مہلک کورونا وائرس نے بھارت میں پنجے گاڑ لیے ہیں اور گزشتہ روز ایک ہی دن میں ریکارڈ 50 ہزار افراد میں وائرس کی تشخیص ہوئی ہے۔

بھارت میں مہلک وائرس سے اب تک 33 ہزار سے زائد افراد ہلاک ہوچکے ہیں جب کہ متاثرہ مریضوں کی تعداد 14 لاکھ سے تجاوز کرچکی ہے۔