چکوال کی خبریں 9.06.2013
Posted on June 10, 2013 By Geo Urdu سٹی نیوز
چکوال(اعجازبٹ)عام انتخابات میں شکست کا بدلہ لینے کے لیے ایم پی اے، ایم این اے کی ایماء پر لیگی کارکنوں کی طرف سے جنڈیال محمود کی سڑکیں اور نالے توڑے جانے پر تحریک انصاف اور انصاف سٹوڈنٹس فیڈریشن کے کارکنان نے بھون چوک چکوال میں احتجاجی مظاہرہ کیا۔ اور واقعہ میں ملوث کرداروں کے خلاف کاروائی کا مطالبہ کیا۔ احتجاجی مظاہرہ کی قیادت ملک شاہد اقبال ایڈووکیٹ ، سید جمیل حیدر شاہ اور راجہ یاسر سرفراز کررہے تھے۔ بھون چوک میں احتجاجی جلوس جلسہ کی شکل اختیار کر گیا۔ جس سے خطاب کرتے ہوئے تحریک انصاف کے رہنمائوں ملک شاہد اقبال ایڈووکیٹ ، راجہ یاسر سرفراز ، سید جمیل حیدر شاہ ، چوہدری طلعت محمود ایڈووکیٹ ، چوہدری احسن زاہد اور راجہ عامر محمود نے جنڈیال محمودکی سڑک توڑے جانے کی شدید مذمت کی اور ارباب اختیار سے مطالبہ کیا کہ وہ فوری طور پر واقعہ کا نوٹس لیں۔ اور ایم این اے و ایم پی اے سمیت واقعہ میں ملوث لیگی کارکنوں کے خلاف مقدمہ درج کریں۔ ورنہ احتجاجی تحریک شروع کی جائے گی۔ ملک شاہد اقبال ایڈووکیٹ نے اعلان کیا کہ اگر ایم این اے میجر طاہر ، ایم پی اے ملک تنویر اسلم اور گائوں کی سڑکیں توڑنے والے کارکنوں کے خلاف اگر کاروائی نہیں کی جاتی تو پورے ملک میں احتجاجی تحریک شروع کی جائے گی۔ سید جمیل حیدر شاہ نے وارننگ دی کہ واقعہ میں ملوث ملزمان کو فوری طور پر گرفتار کیا جائے ورنہ تحریک انصاف کے کارکنان خاموش نہیں بیٹھیں گے۔ قبل ازیں جلوس کے شرکاء نے جنڈیال محمود میں تحریک انصاف کی کامیابی سے سیخ پا ہونے والے لیگی ایم این اے اور ایم پی اے کی طرف سے جنڈیال محمود کی سڑک اکھیڑنے کی شدید مذمت کی اور اسے جمہوریت کا قتل قرار دیا۔جلوس کے شرکاء نے میاں نواز شریف اور شہباز شریف سے مطالبہ کیا کہ انتقامی سیاست کا سلسلہ فوری طور پر بند کیا جائے اور واقعہ میں ملوث ذمہ داران کو کٹہرے میں لایا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کارکنان کی مدد سے سڑکیں اور نالے تباہ کرنے پر احتجاجی مظاہرہ کیا۔
چکوال(نمائندہ خصوصی)تحریک انصاف کے سینکڑوں کارکنان نے جنڈیال محمود میں شکست کا بدلہ لینے کے لیے مسلم لیگ ن کے ایم پی اے تنویر اسلم اور ایم این اے میجر طاہر اقبال کی طرف سے لیگی کارکنان کی مدد سے سڑکیں اور نالے تباہ کرنے پر احتجاجی مظاہرہ کیا۔ جلوس کے شرکاء نے تلہ گنگ روڈ اور بھون روڈ کا چکر لگایا بعد ازاں بھون چوک میں احتجاجی جلسہ میں ملک شاہد اقبال ،سید جمیل حیدر شاہ، راجہ عامر ، چوہدری احسن زاہد اور دیگر مقررین نے دونوں اراکین اسمبلی اور واقعہ میں ملوث لیگی کارکنان کے خلاف مقدمہ درج کرنے کا مطالبہ کیا۔بصورت دیگر احتجاجی تحریک شروع کرنے کی دھمکی دی گئی۔ شرکاء نے اراکین اسمبلی کی انتقامی سیاست کی شدید مذمت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سی این جی سٹیشن ملازمین کے درمیان جھگڑے کے نتیجے میں دو گاڑی مالکان شدید زخمی ہو گئے۔
چکوال(نمائندہ خصوصی)چکوال راولپنڈی روڈ پر سی این جی یونین کے باہر گاڑی مالکان اور سی این جی سٹیشن ملازمین کے درمیان جھگڑے کے نتیجے میں دو گاڑی مالکان شدید زخمی ہو گئے۔ گاڑی مالکان سی این جی یونین پر گیس بھروانے کے لیے کھڑے تھے کہ اس دوران رش پڑ گیا اور سی این جی سٹیشن ملازمین اور ٹرانسپورٹروں کے درمیان جھگڑا کھڑا ہو گیا۔ سی این جی مالکان کی طرف سے فائرنگ کیے جانے کے نتیجے میں دو ٹرانسپورٹرز ارشد ولد شیر محمد ساکن میاں مائر اور ایک نامعلوم شدید زخمی ہو گئے جنہیں فوری طور پر ڈی ایچ کیو ہسپتال چکوال پہنچا دیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گرلز کالج روڈ چکوال کی تعمیر و مرمت میں ناقص میٹریل کے استعمال۔
چکوال(نمائندہ خصوصی) گرلز کالج روڈ چکوال کی تعمیر و مرمت میں ناقص میٹریل
کے استعمال کا انکشاف ہوا ہے اور کالج روڈ کا مین ہول جو کہ چند دن قبل تعمیر کیا گیا ٹوٹ گیا ہے اہلیان علاقہ نے ناقص میٹریل کے استعمال کا نوٹس لینے کا مطالبہ کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہر کے مصروف ترین کاروباری مرکز بلدیہ پلازہ میں شارٹ سرکٹ کے باعث آگ بھڑک اٹھی۔
چکوال (نمائندہ خصوصی) شہر کے مصروف ترین کاروباری مرکز بلدیہ پلازہ میں شارٹ سرکٹ کے باعث آگ بھڑک اٹھی جس کی وجہ سے دو دفاتر کو نقصان پہنچا ریسکیو 1122 کی فائر بریگیڈ گاڑیوںنے دو گھنٹے کی جدوجہد کے بعد آگ پر قابو پا لیا۔ واپڈا لائن سپرنٹنڈنٹ مسعود خان کے بروقت پہنچ جانے کی وجہ سے بڑا نقصان ہونے سے ٹل گیا۔پولیس آگ بجھنے کے آدھے گھنٹے کے بعد موقعہ پر پہنچی۔ ہفتہ کی صبح شارٹ سرکٹ کے باعث بلدیہ پلازہ کی سیکنڈفلور میں اچانک آگ بھڑک اٹھی جو آناً فاناً آسمان سے باتیں کرنے لگی۔ ریسکیو 1122 کو اطلاع دی گئی اور ریسکیو اہلکار فائر بریگیڈ گاڑی کے ہمراہ موقع پر پہنچے بجلی کی مین لائن بند کروائے جانے کے بعد دو گھنٹے کی طویل جدوجہدکے نتیجے میں آگ پر قابو پالیا گیا۔ سیکنڈ فلور کے دو دفاتر کو نقصان پہنچا۔ واضح رہے کہ بلدیہ پلازہ چکوال درجنوں سال قبل تعمیر کیا گیا اور اس کی الماریوں کے شیشے ٹوٹے ہوئے ہیں اور ان میں لوگ کاغذ پھینک دیتے ہیں۔ ایک دفعہ پہلے بھی آتشزدگی ہو چکی ہے مگر ٹی ایم اے چکوال نے کبھی توجہ نہیں دی۔ بلدیہ پلازہ کے دکانداروں نے مطالبہ کیا ہے کہ پلازے کی تعمیر و مرمت کروائی جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایسوسی ایشن کے قیام کا واحد مقصد ضلع بھر کے صحافیوں کے حقوق کا تحفظ کرنا ہے۔
چکوال(نمائندہ خصوصی)ڈسٹرکٹ الیکٹرانک میڈیا ایسوسی ایشن کے صدر شفیق ملک نے کہا ہے کہ ایسوسی ایشن کے قیام کا واحد مقصد ضلع بھر کے صحافیوں کے حقوق کا تحفظ کرنا ہے۔ اور ہم ہر جرنلسٹ مگر کارڈ ہولڈر کو الیکٹرانک میڈیا ایسوسی
ایشن میں خوش آمدید کہتے ہیں۔ نئے شامل ہونیوالوں کے اجلاس سے خطاب کرتے ہوئے شفیق ملک نے کہا کہ ہمارے مقاصد ہر گز جارحانہ نہیں شخصیات کی بجائے اداروں کے پابند صحافی ضلع بھر کی نمائندہ تنظیم کو جوائن کر کے ہماری رہنمائی کریں۔ تاکہ ہم اس فورم کو بہتر انداز میں آ گے بڑھا سکیں۔ ڈسٹرکٹ الیکٹرانک میڈیا کی جس طرح چکوال کے علاوہ تلہ گنگ ،ڈھڈیال، کلرکہار اور چوآسیدن شاہ کے صحافیوںنے پذیرائی کی ہے وہ انتہائی خوش آئند ہے۔انہوں نے کہا کہ کسی بھی گروپ یا شخصیت کو اس تنظیم سے خائف ہونے کی ضرورت نہیں۔ یہاں پر جو بھی اہل ہوگا جمہوری انداز میں آگے آئیگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ ن نے بلدیاتی انتخابات میں کامیابی حاصل کرنے کے لیے جوڑ توڑ کی سیاست شروع کر دی ہے۔
چکوال(نمائندہ خصوصی) مسلم لیگ ن نے بلدیاتی انتخابات میں کامیابی حاصل کرنے کے لیے جوڑ توڑ کی سیاست شروع کر دی ہے۔ سابق ناظمین اور نائب ناظمین سے رابطے کیے جا رہے ہیں تاکہ انہیں مسلم لیگ ن میں شامل کر کے الیکشن جیتا جا سکے۔ متوقع بلدیاتی انتخابات میں مسلم لیگ ن نے یقینی کامیابی حاصل کرنے کے لیے سابق ناظمین اور نائب ناظمین کے ساتھ ساتھ کونسلروں سے بھی رابطوں کا آغاز کیا ہے۔ معلوم ہوا ہے کہ سردار غلام عباس کے کئی قریبی ساتھی ناظمین نے مسلم لیگ ن میں شمولیت کے لیے حامی بھر لی ہے ۔ شہر کی ملحقہ یونین کونسلوں کے سابق ناظمین اور کونسلروں کے گروپ آئندہ چند روز میں ن لیگ میں شامل ہو رہے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جس پر تینوں ملزمان کو احاطہ عدالت سے گرفتار کر لیا گیا۔
چکوال(کورٹ رپورٹر) جس پر تینوں ملزمان کو احاطہ عدالت سے گرفتار کر لیا گیا۔ ایڈیشنل سیشن جج چکوال نے ملزمان واجد ،ساجد اور وسیم کی درخواست
ضمانت خارج کر دی۔ملزمان نے گزشتہ ماہ محمد رضوان کو گھر سے بلا کر قتل کر دیا تھا۔ جس پر ان کے خلاف مقدمہ درج کیا گیا تھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صحافیوں نے ڈسٹرکٹ الیکٹرانک میڈیا ایسوسی ایشن کی ممبر شپ حاصل کر لی۔
چکوال(نمائندہ خصوصی) ڈھڈیال اور تلہ گنگ کے الیکٹرانک میڈیا سے تعلق رکھنے والے سینئر صحافیوں نے ڈسٹرکٹ الیکٹرانک میڈیا ایسوسی ایشن کی ممبر شپ حاصل کر لی۔ ڈھڈیال سے جیو نیوز کے ڈاکٹر ظہیر احمد خان یوسفی ، تلہ گنگ سے اے پی پی اور آج نیوز کے نمائندے طارق عزیز ، دن نیوز کے محبوب الحسن ، اے ٹی وی کے چوہدری عبدالجبار ، چینل فائیو کے نذر حسین چوہدری ایسوسی ایشن میں شامل ہوئے ہیں۔ڈسٹرکٹ الیکٹرانک میڈیا ایسوسی ایشن کے صدر شفیق ملک اور جنرل سیکرٹری عبدالغفور منہاس نے نئے آنیوالوں کو خوش آمدید کہا۔ دریں اثناء ارشاد حسین شاہ کاظمی نیوز ون تلہ گنگ ،علی جواد کاظمی پی ٹی وی ، کیمرہ مین گل عباس کو بھی ممبر شپ دی گئی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
76 لاکھ ووٹروں میں سے اکثریت نوجوانوں کی ہے۔
چکوال(نمائندہ خصوصی) 76 لاکھ ووٹروں میں سے اکثریت نوجوانوں کی ہے تحریک انصاف کے رہنما احسن زاہد نے کہا کہ نوجوان ریڑھ کی ہڈی کی حیثیت رکھتے ہیں۔ اور حالیہ انتخابات میں ان کا ایک بڑا کردار سامنے آیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوہدری احسن زاہد کا کہنا تھا کہ نواز شریف کا سرکاری مراعات نہ لینا تحریک انصاف کے منشور کو تسلیم کرنا ہے۔
چکوال(نمائندہ خصوصی) چوہدری احسن زاہد کا کہنا تھا کہ نواز شریف کا سرکاری
مراعات نہ لینا تحریک انصاف کے منشور کو تسلیم کرنا ہے انہوں نے اس بات پر انتہائی مسرت کا اظہار کیا کہ عمران خان ایک دن اعلان کرتے ہیں تو دوسرے دن اسی بات کو حکومت عملی جامہ پہنا دیتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احسن زاہد نے حالیہ انتخابات میں دھاندلی کو قابل مذمت قرار دیا۔
چکوال(نمائندہ خصوصی) احسن زاہد نے حالیہ انتخابات میں دھاندلی کو قابل مذمت قرار دیا اور کہا کہ پہلی بار گھر سے نکلنے والے ووٹرز کو مایوسی کا سامنا کرنا پڑا۔
چکوال(نمائندہ خصوصی)احسن زاہد کاکہنا تھا کہ الیکشن کمیشن دھاندلی کا داغ دھونے کے لیے بذریعہ تصدیق نشان انگوٹھا گنتی کروائے ورنہ پاکستانی عوام الیکشن کمیشن کے کردار کو نفرت کی نگاہ سے دیکھتی رہے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احسن زاہد نے کہا ہے کہ تحریک انصاف بلدیاتی انتخابات میں بھرپور حصہ لے گی۔
چکوال(نمائندہ خصوصی) انصاف سٹوڈنٹس فیڈریشن ضلع چکوال کے صدر اور نوجوان سیاسی شخصیت چوہدری احسن زاہد نے کہا ہے کہ تحریک انصاف بلدیاتی انتخابات میں بھرپور حصہ لے گی۔ اور نظریاتی کارکنوں کوسامنے لائے گی۔ پارٹی کی ممبر سازی مہم شروع کر دی گئی ہے۔اور عمران خان کا پیغام گھر گھر پہنچانے کا سلسلہ بھی شروع کر دیا گیا ہے۔ اپنے انٹرویو میں اظہار خیال کرتے ہوئے چوہدری احسن زاہد نے کہا کہ عام انتخابات میں تحریک انصاف بلاشبہ ملک کی دوسری بڑی سیاسی پارٹی بن کر سامنے آئی اور انتہائی مختصر مدت میں بڑے مگر مچھوں کا مقابلہ کر کے بڑی پارٹی بننے کا اعزاز حاصل کیا جو کہ ہمارے قائد عمران خان پر بھرپور عوامی اعتماد کا مظہر ہے۔انہوں نے کہا کہ لوگوں میں شعور بیدار ہو رہا ہے احسن زاہد کا کہنا تھا کہ فرقہ واریت اور ذات پات کی سیاست کا خاتمہ تحریک انصاف کا مشن ہے اور بلدیاتی انتخابات میں اسی مشن کا عملی ثبوت کا مظاہرہ بھی کرینگے۔ احسن زاہد نے کہا کہ
عمران خان کے پہلے وعدے کی تکمیل کے پی کے حکومت نے کر دی۔ وزیراعلیٰ نے لاہور میں عمران خان سے ملاقات کی پروٹوکول کی سیاست کا خاتمہ ہوا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوہدری احسن زاہد نے کہا کہ یونین کونسل کی سطح پر آئی ایس ایف کی تنظیم سازی کرینگے۔
چکوال(نمائندہ خصوصی)چوہدری احسن زاہد نے کہا کہ یونین کونسل کی سطح پر آئی ایس ایف کی تنظیم سازی کرینگے۔ اور کارکنان گلی گلی ، کونے کونے پھیل چکے ہیں ۔
چکوال(نمائندہ خصوصی)احسن زاہد کا کہنا تھا کہ آئی ایس ایف نوجوان قیادت کو ترجیح دینے کے لیے مصروف عمل ہے کیونکہ نوجوان ہی اس ملک میں تبدیلی لا سکتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوہدری احسن زاہد نے اپنے انٹرویو میں کہا کہ حالیہ انتخابات میں نوجوان قیادت سامنے لائی گئی۔
چکوال(نمائندہ خصوصی) چوہدری احسن زاہد نے اپنے انٹرویو میں کہا کہ حالیہ انتخابات میں نوجوان قیادت سامنے لائی گئی اور اس سے چکوال کی سیاست کو نیا رخ ملا انہوں نے کہا کہ راجہ یاسر سرفراز نے پہلی دفعہ الیکشن لڑا اور پچاس ہزار سے زائد ووٹ حاصل کیے۔
