سرینگر (جیوڈیسک) مقبوضہ کشمیر میں بھارتی فوجیوں نے ریاستی دہشت گردی کی جاری کارروائیوں میں جنوری 1989 سے اب تک 94,136بے گناہ کشمیریوں کو شہید کیا ہے جن میں سے 7,026کو دوران حراست شہید کیا گیا۔کشمیر میڈیا سروس کے ریسرچ سیکشن کی جانب سے انسانی حقوق کے عالمی دن کے موقع پر جاری ہونے والی رپورٹ کے مطابق قتل کے ان واقعات سے 22,788خواتین بیوہ اور107,500 بچے یتیم ہو گئے۔
رپورٹ کے مطابق اس عرصے کے دوران فوجیوں نے 10,129خواتین کی بے حرمتی کی جبکہ 106,023عمارتوں کو تباہ کیا گیا۔رپورٹ کے مطابق ان 25برسوں کے دوران بھارتی پولیس اور فوجیوں نے 8ہزار سے زائد افراد کو حراست کے دوران لاپتہ کیا۔
رپورٹ میں کہا گیا کہ صرف گزشتہ چھ ماہ کے دوران بھارتی پولیس نے حریت رہنمائوں محمدیاسین ملک، شبیر احمد شاہ، مسرت عالم بٹ، نعیم احمد خان، ظفر اکبربٹ، شبیر احمد ڈار، فاروق احمد ڈار، محمد یوسف نقاش، ایاز اکبر، عبدالاحدپرہ، سید بشیر اندرابی اور مولوی بشیر احمد سمیت ہزاروں نوجوانوں کو گرفتار کر لیا جبکہ سینکڑوں کشمیری کالے قانون پبلک سیفٹی ایکٹ کے تحت مختلف جیلوں میں قید ہیں۔
