ممبئی (اصل میڈیا ڈیسک) بھارتی ٹی ٹوئنٹی اور ون ڈے کرکٹ ٹیم کے کپتان روہت شرما انجری کے باعث جنوبی افریقا کے خلاف 3 میچز پر مشتمل ایک روزہ سیریز سے بھی باہر ہو گئے۔
بھارتی کرکٹ بورڈ کے مطابق حال ہی میں ویرات کوہلی کی جگہ ون ڈے اور ٹی ٹوئنٹی ٹیم کے کپتان بنائے جانے والے روہت شرما اپنی انجری سے صحتیاب نہیں ہوسکے جس کی وجہ سے وہ جنوبی افریقا کے خلاف ایک روزہ سیریز سے باہر ہو گئے۔
بھارتی کرکٹ بورڈ کے مطابق روہت شرما کی غیر موجودگی میں کے ایل راہول بھارتی ٹیم کی قیادت کریں گے جبکہ جسپریٹ بمرانائب کپتان ہوں گے۔
واضح رہے کہ بھارتی کرکٹ ٹیم ان دنوں جنوبی افریقا کے دورے پر ہے جہاں دونوں ملکوں کے درمیان ٹیسٹ سیریز جاری ہے، روہت شرما انجری کے باعث ٹیسٹ سیریز بھی نہیں کھیل سکے تھے۔
خیال رہے کہ بھارت اور جنوبی افریقا کے درمیان ون ڈے سیریز 19 جنوری سے شروع ہوگی۔
پی ایس ایل 7؛ کورونا نے ابھی سے حکام کو ڈرانا شروع کر دیا
ٹی ٹوئنٹی ورلڈ کپ میں بھارت کے خلاف فتح سال کا یادگار لمحہ ہے، بابر اعظم
