سیکرٹری الیکشن کمیشن کا کہنا ہے کہ کراچی میں فوج کی مدد سے ووٹر لسٹوں کی تصدیق کا عمل جنوری میں شروع ہو جائے گا، آج اجلاس میں اہم فیصلے ہوں گے۔ عدالت عظمی نے کراچی میں فوج کی نگرانی میں انتخابی فہرستوں کی گھر گھر تصدیق کا حکم دیا تو الیکشن کمیشن نے تیرہ دسمبر کو اس معاملے پر سر جوڑ کر بیٹھنے کا فیصلہ کر لیا۔
سیکرٹری الیکشن کمیشن اشتیاق احمد نے ذرائع سے گفتگو کرتے ہوئے کہا کہ کراچی میں ووٹروں کی تصدیق اور نئی حلقہ بندیوں کا عمل جنوری کے پہلے ہفتے سے شروع ہو کر فروری کے اختتام تک مکمل ہو گا۔
آئندہ دو ہفتوں میں لاجسٹک پلان مکمل کر لیا جائے گا۔ انکا کہنا تھا کہ انتخابات میں تاخیر کاکوئی امکان نہیں۔ سیکرٹری الیکشن کمیشن کا کہنا ہے کہ کراچی میں نئی حلقہ بندیوں کے معاملے پر پندرہ سیاسی جماعتوں کی تجاویز موصول ہو چکی ہیں جن کا جائزہ آج ہونے والے اجلاس میں لیا جائے گا۔ انہوں کہا کہ سیاسی جماعتوں کی اکثریت نے کراچی میں عام انتخابات کے دوران امن و امان کی خراب صورتحال سے متعلق خدشات کا اظہار کیا ہے اور پولنگ اسٹیشنز پر فوج تعینات کرنے کی بھی درخواست کی ہے۔
کراچی میں ووٹوں کی تصدیق اور نئی حلقہ بندیوں پر کئی سیاسی حلقوں نے تحفظات کا اظہار تو کیا ہے تاہم الیکشن کمیشن کا کہنا ہے کہ سپریم کورٹ کے فیصلے پر ہر صورت عمل ہو گا اور اس میں فوج کی مدد بھی لی جائے گی۔
مسلم لیگ ن کا یکم جنوری سے انتخابی مہم کے آغاز کا فیصلہ
پاک بیلا روس تجارتی تعلقات مزید مضبوط بنانے پر اتفاق
