یا رب یہ جہانِ گزراں خوب ہے لیکن
Posted on June 10, 2012 By Adeel Webmaster علامہ محمد اقبال
quran
یا رب یہ جہانِ گزراں خوب ہے لیکن
کیوں خوار ہیں مردانِ صفا کیش و ہنر مند؟
گو اس کی خدائی میں مہاجن کا بھی ہے ہاتھ
دنیا تو سمجھتی ہے فرنگی کو خداوند
تو برگ گیا ہے نہ دہی اہلِ خرد را
او کشت گل و لالہ بہ بخشد بہ خرے چند
حاضر ہیں کلیسا میں کباب و مئے گلگوں
مسجد میں دھرا کیا ہے بخر موعظہ و پند
احکام ترے حق ہیں مگر اپنے مفسر
تاویل سے قرآن کو بنا سکتے ہیں پازند
فردوس جو تیرا ہے کسی نے نہیں دیکھا
افرنگ کا ہر قریہ ہے فردوس کی مانند
مدت سے ہے آوارئہ افلاک مرا فکر
کر دے اسے اب چاند کی غاروں میں نظر بند
فطرت نے مجھے بخشے ہیں جوہرِ ملکوتی
خاکی ہوں مگر خاک سے رکھتا نہیں پیوند
درویشِ خدا مست نہ شرقی ہے، نہ غربی
گھر میرا نہ دلی، نہ صفا ہاں، نہ ثمر قند
کہتا ہوں وہی بات سمجھتا ہوں جسے حق
نے ابلہ مسجد ہوں، نہ تہذیب کا فرزند
اپنے بھی خفا مجھ سے ہیں، بیگانے بھی ناخوش
میں زہر ہلاہل کو کبھی کہہ نہ سکا قند
مشکل ہے کہ اک بندئہ حق بین و حق اندیش
خاشاک کے تودے کو کہے کوہ و ماوند
ہوں آتشِ نمرود کے شعلوں میں خاموش
میں بندئہ مومن ہوں، نہیں دانہ اسپند
پر سوز و نظر بازوں کو بیں و کم آزار
آزاد و گرفتار و تہی کیسہ و خورسند
ہر حال میں میرا دل بے قید ہے خرم
کیا چھینے گا غنچے سے کوئی ذوقِ شکر خند
چپ رہ نہ سکا حضرتِ یزداں میں بھی اقبال
کرتا کوئی اس بندئہ گستاخ کا منہ بند
علامہ محمد اقبال
یہ کون غزل خواں ہے پُر سوز و انشاط انگیز
وہی میری کم نصیبی، وہی تیری بے نیازی
