اسلام آباد (جیوڈیسک) وزیراعظم نواز شریف نے کہا ہے کہ کراچی میں آپریشن کا کریڈٹ مسلم لیگ (ن) کی حکومت کو جاتا ہے اور ہر گزرتے دن کے ساتھ شہر کی صورت حال بہتر ہو رہی ہے۔
اسلام آباد میں وزیراعظم نواز شریف سے گوجرانوالہ، سیالکوٹ، نارووال، حافظ آباد اور گجرات سے تعلق رکھنے والے مسلم لیگ (ن) کے ارکان قومی اسمبلی نے ملاقات کی، جس میں ملک کو درپیش چیلنجز اور ان سے نمٹنے کے لئے حکومتی اقدامات پر تفصیلی تبادلہ خیال کیا گیا۔
ملاقات کے دوران وزیر اعظم نے کہا کہ حکومت کو توانائی کا بحران ورثے میں ملا ہے جس کے خاتمے کے لئے مسلسل اقدامات کئے جارہے ہیں۔ 2017 تک ملک سے بجلی کی لوڈ شیڈنگ پر قابو پالیا جائے گا۔ انہوں نے کہا کہ پاکستان کو ترقی کی شاہراہ پر گامزن کرنے کے لئے ہمیں ملک سے دہشت گردی کا خاتمہ کرنا ہو گا۔
وزیر اعظم نواز شریف نے کہا کہ کراچی ملک کا معاشی حب ہے جہاں امن ملک کی ترقی کے لئے بہت ضروری ہے، شہر میں آپریشن شروع کرنے کا کریڈٹ مسلم لیگ (ن) کی حکومت کو جاتا ہے، ہم نے تمام جماعتوں سے اتفاق رائے کے بعد آپریشن کا آغاز کیا اور ہر گزرتے دن کے ساتھ شہر کی صورت حال بہتر ہورہی ہے۔
خیبرایجنسی: پاک افغان سرحدی علاقے میں ڈرون حملہ، 7 کمانڈروں سمیت 9 دہشتگرد ہلاک
گجرات پولیس کا کارنامہ: 7 سالہ بچے کے خلاف اغوا کا مقدمہ درج کر لیا
