واشنگٹن (جیوڈیسک) امریکی صدر نے چین سے تجارتی جنگ چھیڑنے اور ایران پر اقتصادی پابندیوں کے تابڑ توڑ حملوں کے بعد یورپی یونین کی درآمدی اشیاء پر اضافی ٹیکس عائد کرنے کی دھمکی دے کر نیا محاذ کھول لیا۔
حال ہی میں جی-20 سمٹ کے دوران چین سے جاری تجارتی جنگ کے خاتمے کی فضا سازگار ہی ہوئی تھی کہ کسی کُل چین سے نہ بیٹھنے والے ڈونلڈ ٹرمپ نے یورپی یونین کی درآمدی مصنوعات پر کئی ارب کے اضافی ٹیکس عائد کرنے کی دھمکی دے دی۔
عالمی خبر رساں ادارے کے مطابق اس حوالے سے امریکی تجارتی نمائندے رابرٹ لائٹزر نے یورپی یونین کی مصنوعات کی فہرست کی تفصیلات بتاتے ہوئے اعلان کیا کہ صدر ٹرمپ کی ہدایت پر بیان کردہ درآمدی اشیاء پر 4 ارب ڈالر کے اضافی ٹیکس عائد کیے جائیں گے۔
صدر ٹرمپ کے ممکنہ فیصلے سے چوکنا یورپی یونین نے پہلے ہی امریکا کو خبردار کرتے ہوئے کہا تھا کہ اگر امریکا کی جانب سے ٹیکس عائد کرنے کی کوشش کی گئی تو یورپی یونین کے ممالک بھی جوابی کارروائی کرنے پر مجبور ہو جائیں گے۔
واضح رہے کہ صدر ڈونلڈ ٹرمپ نے اقتدار سنبھالتے ہی ملکی معاشی پالیسیوں کو احمقانہ قرار دیتے ہوئے چند سخت اور نہایت متنازع فیصلے کیے تھے جس کے باعث چین اور امریکا کے درمیان ایک دوسرے کی درآمدی اشیاء پر ٹیکسوں کی گولا باری کا آغاز ہوگیا تھا جب کہ ایران پر پہلے ہی اقتصادی پابندیاں عائد کر رکھی ہیں۔
لیبیا: تارکین وطن کے مرکز پر فضائی حملہ، 40 افراد ہلاک، 80 زخمی
امریکا نے بلوچستان لبریشن آرمی کو عالمی دہشت گرد تنظیم قرار دیدیا
