حکومت فی الفور حکومت ایران سے رابطہ کرے۔ ناصر عباس جعفری

Posted on November 2, 2013 By Majid Khan سٹی نیوز

مجلس وحدت مسلمین پاکستان کے سربراہ علامہ ناصر عباس جعفری نے ایران پاکستان گیس پائپ لائن منصوبے پر سست روی اور حکومت کی طرف اقدامات نہ کیے جانے پر اظہار افسوس کرتے ہوئے تاکید کی ہے کہ حکومت فی الفور حکومت ِایران سے رابطہ کرے اور اس منصوبے سے متعلق پھیلائی جانیوالی بدگمانیوں کا خاتمہ کرے۔ اسلام آباد سے مجلس وحدت مسلمین کے مرکزی میڈیا سیل کے مطابق، علامہ ناصر عباس جعفری نے ان خیالات کا اظہار گلگت میںدفاع وطن کنونشن کے سلسلہ میں نگر میں مختلف عمائدین سے ملاقات کے دوران کیا۔ انہوں نے ایرانی وزیرتیل کی جانب سے حکومت پاکستان کی طرف سے عدم دلچسپی کے اظہار اور منصوبے پر عملدرآمد کے حوالے سے پرامید نہ ہونے کو حکومت ِ پاکستان کیلئے سوالیہ نشان قرار دیا۔انہوں نے کہا کہ نواز حکومت سے متعلق پہلے ہی باتیں گردش کررہی ہیں کہ وہ اس منصوبے پر عملدار کیلئے مخلص نہیں ہے۔

ان کا کہنا تھا کہ ملک پہلے ہی توانائی بحران سے دوچار ہے، ایک طرف صنعتیں بند ہورہی ہیں تو دوسری جانب گھریلوصارفین کو شدید مشکلات کا سامنا ہے۔ ایسے میں ایران پاکستان گیس پائپ لائن منصوبہ اس بحران پر قابوپانے کیلئے ایک بہترین آپشن ہے جسے ہر قیمت پر بروقت مکمل ہونا چاہیے۔علامہ ناصر عباس جعفری نے کہا کہ حکومت نیلی پیلی ٹیکسی سکیم، لیپ ٹاپ اور آشیانہ ہاوسنگ سکیم جیسے منصوبے کو چھوڑ کر فوری طور پر آئی پی منصوبے کیلئے رقم مختص کرے اور کام شروع کرے۔

انہوں نے مذید کہا کہ امریکہ کے دباؤ پر برادر اسلامی ملک سے تعلق خراب نہیں کرنے دیں گے۔ گیس پائپ لائن منصوبہ پاکستان کے مفاد میں ہے جس پر کسی قسم کے دباؤ کو قبول نہیں کیا جاناچاہیے۔ یاد رہے کہ معاہدے کے مطابق پاکستان کو دسمبر دوہزارچودہ میں اس منصوبے کو مکمل کرنا ہے جبکہ ایران اپنی طرف سے سرحد تک پائپ لائن بچھا چکا ہے۔

by Majid Khan

Nasir Mehmood - Chief Editor at GeoURDU.com