پاکستان آج جن خطرات اور مسائل میں گھرا ہوا ہے حکومت تنہا ان مسائل سے چھٹکارا حاصل نہیں کر سکتی، روحیل اکبر
Posted on June 26, 2013 By Tahir Webmaster سٹی نیوز
تحریک تحفظ پاکستان کے مرکزی رہنماء روحیل اکبر نے ملک کو درپیش سنگین چیلنجز سے نمٹنے اور متفقہ قومی پالیسی بنانے کیلئے حکومت سے فوری آل پارٹیز کانفرنس بلانے کا مطالبہ کرتے ہوئے کہا ہے کہ موجودہ حالات میں انفرادی نہیں اجتماعی کردار ادا کرنے کی ضرورت ہے نانگا پربت، پشاور، کوئٹہ میں دہشتگردی کا واقعہ اور زیارت میں قائد اعظم کی ریذیڈنسی پر حملہ انتہائی الارمنگ ہے۔
اپنے ایک جاری بیان میں انہوں نے کہا کہ پاکستان آج جن خطرات اور مسائل میں گھرا ہوا ہے حکومت تنہا ان مسائل سے چھٹکارا حاصل نہیں کر سکتی اسکے لئے تمام سیاسی و مذہبی جماعتوں کو اپنا کردار ادا کرنے کیلئے ایک میز پر بیٹھنا ہو گا۔ ملک کو درپیش سنگین چیلنجز سے نمٹنے اور آئندہ کے لئے قومی پالیسی بنانے کے لئے حکومت بلا تاخیر آل پارٹیز کانفرنس کال کرے۔
انہوں نے ملک بھر میں دہشتگردی کے واقعہ میں معصوم جانوں کے ضیاع اور بانی پاکستان کی ریذیڈنسی پر حملے پر افسوس کا اظہار کرتے ہوئے کہا کہ ایسا سفاک عمل کرنے والے کسی طرح بھی مسلمان نہیں ہو سکتے۔ پاکستانی قوم کی ہمت اور حوصلے چٹانوں سے مضبوط ہیں انشا اللہ پوری قوم متحد ہو کر دہشتگردوں کو شکست فاش سے دوچار کر یگی۔
