حکومت کا ہرآنے ولا نیا دن گذرے دن کی نسبت عوام پر بھاری پڑ رہا ہے، روحیل اکبر
Posted on September 13, 2013 By Tahir Webmaster سٹی نیوز
تحریک تحفظ پاکستان کے مرکزی جوائنٹ سیکریٹری اطلاعات روحیل اکبر نے کہا ہے کہ حکومت کا ہرآنے ولا نیا دن گذرے دن کی نسبت عوام پر بھاری پڑ رہا ہے ٹیکسوں تلے دبی ہوئی قوم کو مہنگائی کے پہاڑ تلے دفن کیا جارہا ہے یہی وجہ ہے کہ اب آئے روز ملک کے کسی نہ کسی شہر سے خودکشیوں اور بچوں کو مارنے جیسے گھنائونے مکروہ کاموں کی خبریں تواتر سے آرہی ہیں اور ہماری حکومت ہے کہ ستو پی کر سو رہی ہے اپنے ایک جاری بیان میں انہوں نے کہا کہ ابھی کل ہی کہ بات ہے کہ شیخوپورہ میں ایک باپ غربت کے ہاتھوں مجبور ہوکر دو بیٹیوں کو ریلوے لائن پرچھوڑ کر چلا گیا جبکہ اسی روز کراچی میں نامعلوم شخص تین معصوم ننھی پریاں صائمہ، عتیقہ اور آمنہ جو سوائے اپنا نام بتانے کے اور کچھ نہیں جانتیں کو کھارادر پولیس ا سٹیشن میں چھوڑ گیا۔
اگر حکومت نے ہوش کے ناخن نہ لیے تو پھر ملک میں پھیلنے والی تمام ابتری کی ذمہ داری موجودہ حکومت پر عائد ہوگی اسلیے حکومت کو خواب خرگوش سے بیدار ہوکر ملک وقوم کی بہتری کے لیے ہنگامی بنیادوں پر کام کرنے کی ضرورت ہے تاکہ ایک عام غریب انسان کا معیار زندگی بھی بلند ہوسکے۔